عباسي، منور علي، حاجي: مشهور سياستدان حاجي منور علي عباسي ولد حاجي خان محمد عباسي، 30 سيپٽمبر 1944ع تي ڳوٺ وليد، تعلقي ۽ ضلعي لاڙڪاڻي ۾ پيدا ٿيو. هن ابتدائي تعليم گورنمينٽ پرائمري اسڪول وليد، مئٽرڪ 1960ع ۾ گورنمينٽ هاءِ اسڪول لاڙڪاڻي مان، بي. اي گورنمينٽ ڊگري ڪاليج لاڙڪاڻي مان 1966ع ۾، ۽ ايل. ايل. بي گورنمينٽ لا ڪاليج لاڙڪاڻي مان 1981ع ۾ حاصل ڪئي. منور عباسي شاگرديءَ واري دور ۾ والي بال ۽ ڪرڪيٽ جو سٺو رانديگر رهيو. 1977ع ۾ ڊسٽرڪٽ ڪرڪيٽ ايسوسيئيشن لاڙڪاڻي جو صدر، 1989ع ۾ لاڙڪاڻي ڊويزنل ڪرڪيٽ ايسوسيئيشن جو صدر، 96-1995ع ۾ سنڌ اسپورٽس بورڊ جو ميمبر ۽ بورڊ آف ڪرڪيٽ ڪنٽرول آف پاڪستان (BCCP) جو تاحيات ميمبر آهي. منور عباسي جي سياسي وابستگي پ پ پ سان رهي. هو پارٽيءَ جو بنيادي ميمبر هئڻ سان گڏ 1970ع کان 1973ع تائين پ پ پ تعلقي لاڙڪاڻي جو صدر، 1973ع کان 1976ع تائين پ پ پ ضلعي لاڙڪاڻي جو جنرل سيڪريٽري، ۽ شهيد بينظير جي حياتيءَ تائين پ پ پ جي سنڌ ڪائونسل جو ميمبر رهيو. هيءُ مارشل لا حڪومت دوران ايم. آر. ڊي جدوجهد ۾ وقت بوقت جيل ۾ رهيو. منور عباسي 1979ع ڌاري ضلعي ڪائونسل لاڙڪاڻي جو ميمبر چونڊيو. 1980ع ۾ تعلقي لاڙڪاڻي ڪائونسل جو چيئرمئن، 1981ع ۾ لاڙڪاڻي ڊسٽرڪٽ ڪوآرڊينيشن ڪميٽيءَ جو وائيس چيئرمئن رهيو. ايم. آر. ڊي تحريڪ دوران 1983ع ۾ احتجاج طور سڀئي عهدا ڇڏيائين. 1987ع ۾ پ پ پ پاران بلدياتي چوندن ۾ لاڙڪاڻي ميونسپالٽيءَ جو ميمبر ۽ ميونسپالٽيءَ جو چيئرمئن چونڊيو، جتي 1990ع تائين خدمتون سرانجام ڏنائين. 8 نومبر 1988ع تي عام چونڊن ۾ پ پ جي ٽڪيٽ تان سنڌ اسيمبليءَ جو ميمبر چونڊيو. جنهن دوران ٽرانسپورٽ، بهبود آبادي ۽ بلديات جو وزير رهيو. 1990ع ۾ سنڌ اسيمبليءَ جو ميمبر چونڊيو. 1993ع جي چونڊن ۾ شهيد مير مرتضيٰ ڀُٽي جي مقابلي ۾ بيٺو، پر کٽي نه سگهيو. منور عباسي 1997ع جي اليڪشن ۾ وارهه جي تڪ تان سنڌ اسيمبليءَ جو ميمبر چونڊيو.
1944.09.30 عيسوي
حاجي منور علي عباسي ولد حاجي خان محمد عباسي، 30 سيپٽمبر 1944ع تي ڳوٺ وليد، تعلقي ۽ ضلعي لاڙڪاڻي ۾ پيدا ٿيو.